Hardho Sayoko.Spb
- Layange Lazuardi Adi Sage lan Adek Alwi
Apa angele mindhah khabar saka lambe neng larikan tulisan
pira suwene ngrata gunung lan ngremet mriyem dadi silhuet neng dlancang
maca geguritan karo mendem wus dudu jamane nek kepingin mbaleni
merga sing biyen kerep ngrangkul gendul sak iki wis angok pangangene
sak wise kebanda nikmate dzikir karo ngubengake rentengan tasbeh
Aja nyuntak mangsi sing katutan getih lan butheke luh
saka telenge panalangsa duweke sing kipa-kipa bakal ngundhuh wirang
sak wise dom sumurupe banyu ninggal teyeng neng jero bothekan
lan ketok wagu saben jajal malang kerik neng ara-ara karo kayang
Apa isih ana petunge suwarane ati karo kobare kekarepan
wong pamer kertu karo dhehem wis kena dipesthekake bisa jelma dadi barongan
mula angur milih adus kringet lan nandur impen neng langit sing dadi penggaotan
tinimbang nunggang jaran sembrani ning mung klaopan karo ancang-ancang
mlothot udun neng uteke sing bar nyundhul rembulan neng awang-awang
Kedunggalar, 2006
Tidak ada komentar:
Posting Komentar